MY BLOG DIARY

 പഴയ വീട് വാടകക്ക് കൊടുത്ത വാടകക്കാരൻ വാടക തരാതെ ആയപ്പോഴാണ് ഞാൻ അയാളെ കുറിച്ച് ചിന്തിക്കാൻ തുടങ്ങിയത്. അയാൾ എന്തുകൊണ്ടായിരിക്കും വാടക തരാത്തത്? അയാളുടെ ബിസിനസ്സും ഒരു വാടക മുറിയിലാണ് എന്നാണ് കേട്ടത്. അയാൾ രണ്ട് പേർക്ക് വാടക കൊടുക്കണം. ഇങ്ങനെ ഒക്കെ ചിന്തിച്ചപ്പോൾ വാടക എന്ന ആശയത്തോട് ഒരു പ്രത്യേഗ താല്പര്യം തോന്നി. നമ്മൾ വാടക കൊടുക്കാതെ എന്തെല്ലാം ചെയുന്നുണ്ടായിരിക്കും എന്ന് ഞാൻ വെറുതെ ഒന്ന് ആലോചിച്ചു നോക്കി. നമ്മൾ മറ്റൊരാളുടെ ഹൃദയത്തിൽ ജീവിക്കുന്നത് വാടക കൊടുത്തിട്ടാണോ. അപ്പോഴാണ് വാടകക്കൊരു ഹൃദയം എന്ന നോവലിന്റെ പേര് കടന്ന് വന്നത്. ഹൃദയം വാടകക്ക് കൊടുക്കുക. മനോഹരമായ ആശയം. എത്രയായിരിക്കും ഹൃദയത്തിന് ഒരു ദിവസത്തെ വാടക.ചിന്തകൾ കാടുകയറാൻ തുടങ്ങി.നമ്മൾ ജീവിക്കുന്ന ഭൂമി നമ്മുടെ സ്വന്തം ആണോ? നമ്മൾ അവിടെ വാടകക്കാരല്ലേ.നമ്മൾ മരിക്കുന്നത് വരെ ഭൂമി നമുക്ക് വേണ്ട എല്ലാ കാര്യങ്ങളും ഒരുക്കി തരുന്നു. ഇതിന് നമ്മൾ ഒരു വാടകയും കൊടുക്കുന്നില്ലല്ലോ.ഇതുപോലെ നിങ്ങളും ഒരുപാട് ഇടങ്ങളിൽ ജീവിക്കുന്നുണ്ടാകും, ഒരുപാട് പേരുടെ മനസ്സിൽ താമസിക്കുന്നുണ്ടാകും ഒരു രൂപ പോലും വാടക കൊടുക്കാതെ. 

കാലവർഷം പെയ്തു തുടങ്ങിയാൽ സ്‌കൂളിലേക്ക് പോകുന്ന വഴിക്കുള്ള പാടങ്ങൾ എല്ലാം നിറയും . റോഡിന്റെ ഇരുവശത്തും ഉള്ള പാടങ്ങൾ നിറഞ്ഞാൽ വെള്ളം റോഡ് മുറിച്ച് ഒഴുകാൻ തുടങ്ങും .  അപ്പോൾ റോഡിലൂടെ മീനുകൾ ഇഴഞ്ഞു പോകുന്നത് കാണാം .  ആളുകൾ അങ്ങനെ വരുന്ന മീനുകളെ പിടിക്കാനായി ഇറങ്ങും . റോഡിലൂടെ ഉള്ള മീനുകളുടെ പോക്കും ആളുകളുടെ മീൻ പിടുത്തവും നല്ല രസമുള്ള കാഴ്ചയാണ് .  

മറ്റൊരു ഓർമ്മ കണ്ണുനീർ തുള്ളിയെ കുറിച്ചാണ് .  മഴപെയ്താൽ വേലികളിൽ നിൽക്കുന്ന വള്ളികളിൽ ഉള്ള വേര് പോലെ ഉള്ള ഭാഗത്ത് ഒരുത്തുള്ളി വെള്ളം ഒട്ടിച്ചു വച്ചപോലെ പറ്റിപിടിച്ചു നിൽക്കും .  അത് പറിച്ചെടുത്ത് കണ്ണിൽ പുരട്ടുമ്പോൾ ഉണ്ടാകുന്ന ഒരു കുളിര് പ്രത്യേക കുളിര് തന്നെ ആണ് .  കണ്ണ് വൃത്തിയാക്കാൻ ഈ കണ്ണുനീർ തുള്ളി നല്ലതാണ് എന്നാണ് പറയാ .  എന്തോ നല്ല സുഖമാണ് അത് കണ്ണിൽ പുരട്ടുമ്പോൾ . 

ഇങ്ങനെ പോകുന്നു ഓർമ്മകൾ. ഇനിയും ഉണ്ട് ഒരുപാട് പറയാൻ .  പിന്നീട് ഒരിക്കൽ എഴുതാം .  ഇപ്പോഴത്തെ മഴയുടെ പ്രകൃതം കണ്ടപ്പോൾ പഴയ മഴക്കാലം ഓർത്ത് പോയതാണ് . കാലം മാറുമ്പോൾ എല്ലാം മാറുമല്ലോ .  മഴയും . 

മഴക്കാലത്ത് റോഡുകളിൽ കണ്ടുവരുന്ന ഒരു പ്രതിഭാസമാണ് , കുഴികൾ .  കുഴികളെ പൊതുവെ രണ്ടായി തരം തിരിക്കാം. സാധാരണ കുഴികൾ, മഴക്കാലത്ത് ഉണ്ടാകുന്ന സ്പെഷ്യൽ കുഴികൾ. സാധാരണ കുഴികളെ കുറിച്ച് ആരും ഒന്നും സംസാരിക്കാറില്ല .  എല്ലാവർക്കും ഇഷ്ട്ടം മഴക്കാല സ്പെഷ്യൽ കുഴികൾ ആണ് .  കാരണം മഴക്കാല സ്പെഷ്യൽ കുഴികളിൽ തങ്ങി നിൽക്കുന്ന ജലം തന്നെ .  മഴക്കാല കുഴികൾ ജല സംഭരണികൾ ആണ് .  അതുകൊണ്ടു തന്നെ വാഹനം ഓടിക്കുന്നവർക്ക് കുഴിയുടെ ആഴം കണ്ടെത്തുക അസാധ്യം ആണ് .  അതുകൊണ്ട് ഉണ്ടാകുന്ന അപകടങ്ങളും ഈ കുഴികളെ ശ്രദ്ധേയമാക്കുന്നു .  അതുകൊണ്ട് മഴക്കാല കുഴികളെ അപകടക്കുഴികൾ എന്നും പറയാം .  രണ്ട് ദിവസമായി മനോരമ കുഴികളെ കുറിച്ച് ഒരു പേജ് വാർത്ത കൊടുക്കുന്നുണ്ടെങ്കിൽ ഒന്ന് ഉറപ്പിക്കാം ,  കുഴികൾ കൊണ്ട് ഉണ്ടാകുന്ന ബുദ്ധിമുട്ട് ചില്ലറയല്ല .  കുഴികളെ പറ്റി ഭരണപക്ഷ അനുഭാവികളോട് ചോദിച്ചാൽ പറയും ,  "അതിപ്പോ ചന്ദ്രനിൽ വരെ കുഴിയില്ലേ. " എന്ന് .  ഭരണ പ്രതിപക്ഷങ്ങൾ പരസ്പരം കുറ്റപെടുത്തിയതുകൊണ്ട് റോഡിലെ കുഴി തനിയെ അടയാൻ പോകുന്നില്ല .  അതിന് എന്താണ് ഒരു പരിഹാരം എന്ന് നോക്കിയാൽ ഏറ്റവും എളുപ്പത്തിൽ ചെയ്യാവുന്നത് ,  മഴയ്ക്ക് മുൻപ് കുഴികൾ എല്ലാം അടക്കാൻ ഒരു ഓർഡർ പാസ്സാക്കുക എന്നതാണ് .  ഇനി മഴയ്ക്ക് ശേഷം ഉണ്ടാകുന്ന കുഴികൾക്കോ, അത് അടക്കാൻ ഒരു ടീമിനെ നിയമിക്കുക. ഇങ്ങനെ എന്തെങ്കിലും പ്രാവർത്തികമാകുന്ന പരിഹാരം  നടപ്പിലാക്കാനാണ് കുഴിയെ കുറ്റം പറയുന്നവർ ശ്രമിക്കേണ്ടത് .  അങ്ങനെ ചെയ്താൽ അവരുടെ പ്രവർത്തനം കൊണ്ട് ഒരു ഉപകാരം ഉണ്ടാകുകയും ചെയ്യും .  അടുത്ത കൊല്ലം ഇതേ സമരം ആവർത്തിക്കുന്നത് ഒഴിവാക്കുകയും ചെയ്യാം .